Prestigjiozja britanike “The Financial Times” i ka kushtuar një vend të rëndësishëm dorëheqjes së Presidentit të Republikës së Kosovës, Fatmir Sejdiu.
E përditshmja londineze shkruan se dorëheqja e detyruar e Sejdiut e ka tronditur keq koalicionin qeverisës, gjë që mund të shkaktojë rënien e Qeverisë, apo ta detyrojë atë të kërkojë përkrahjen e partive më të vogla. Sipas “The Financial Times”, largimi i Presidentit kosovar mund të shtyjë edhe fillimin e negociatave mes Prishtinës dhe Beogradit.
Thika pas shpine
Duke cituar përkrahësit e Fatmir Sejdiut në Prishtinë, korrespondenti i kësaj gazete në Ballkan thotë se Sejdiut i “kanë rënë me thikë pas shpine” aleatët e tij të dikurshëm, duke përfshirë edhe zyrën mbikëqyrëse të udhëhequr nga Bashkimi Evropian. Gazeta citon pjesën e deklaratës së dorëheqjes të Sejdiut, në të cilën ai tha se "në bazë të marrëveshjes me forcat politike në vend dhe me faktorin ndërkombëtar, unë kam besuar se mbajtja e postit të Kryetarit të LDK-së, duke mos e ushtruar atë funksion... nuk përbën shkelje të kësaj Kushtetute".
Pavarësia “The Financial Times” flet përmbledhtas për pavarësinë e Kosovës dhe historinë e koalicionit mes PDK-së dhe LDK-së, të udhëhequr nga Thaci dhe Sejdiu, dhe më pas shkruan se sipas Kushtetutës do të duhej të mbaheshin zgjedhje të reja mbas pavarësimit të vendit, por të dy liderët bënë marrëveshje koalicioni, e cila u përkrah nga Pieter Feith, emisar i Unionit Evropian, për hir të stabilitetit në atë kohë. "The Financial Times" thekson se të dy liderët janë ndeshur hapur kur LDK-ja e z. Sejdiu fitoi në qytetet kryesore në zgjedhjet komunale nëntorin e kaluar. Në fund, prestigjiozja britanike pohon se partitë opozitare po ashtu kanë ngritur dyshime për legjitimitetin e mandatit të z. Thaçi.
Post a Comment